Útivsvæðið er svæði hlutverkaleiksins og ímyndunar, ekki síður en hreyfingar. Þar skapst börnum mest frelsi til athafna, sem er ákaflega nauðsynlegt og það er trú okkar að útivist efli hreysti og vellíðan. Á sumrin er mikil útivera og aukin áhersla er lögð á vettvangsferðir. Stundum er nesti gripið með og jafnvel verið burtu lungann úr deginum.

Án annarra væri maður harla lítilfjörlegur. Samvera nefnist sú stund sem börn og fullorðinn eiga saman og er þá einatt spjallað, lesið, sungið eða sagðar sögur. Bækur eru ávallt aufúsugestir í Hagaborg og ekki hvað síst vegna þeirrar gleði sem sögur veita, en einnig vegna styrkingar orðaforða og málskilnings. Söngur skapar mikla samkennd og notalega nærveru, en síðast en ekki síst hefur sagnamenning lengi blómstrað í Hagaborg. Víða í starfsmannahópnum leynast botnlausar söguskjóður. Í sagnaheimi sameinast börn og fullorðinn og skapa andartak sem er þeirra og engra annarra.
 

Í hópastarfinu mótar hver hópur fyrir sig þá leið sem hentar, allt eftir samsetningu hópsins, áhuga og aðstæðum hverju sinni. Hóparnir vinna einnig að sameiginlegu þema og skapar það heildarbrag og sameiginlega reynslu. Hópstundirnar gefa tækifæri til að rækta einbeitingu og hugmyndaflug –um leið og kafað er dýpra í viðfangsefni með hjálp og leiðsögn fullorðinna. Í vinnu smærri hópa gefst hópstjórum tækifæri á að kynnast og fylgjast nánar með hverju barni fyrir sig og átta sig betur á styrk barnsins og persónu.

Í valstundunum velja börnin leikefni og leiksvæði og stundum leikfélaga. Val barnanna gefur þeim ramma um verkefnin og það lærir smátt og smátt að standa við val sitt og að ekki er alltaf hægt að fá það sem maður vill – það þarf að skiptast á. Val eykur börnunum tilfinningu fyrir sjálfdæmi í leikskólanum og að þau hafi um það að segja hvað skuli aðhafst.